روايات يمنية جميلة جدا خبـايــا القلـ♥ـب20

خبـايــا القلـ♥ـب


البارت #115#


خالد  : اليوم ماعتروحش البيت الا وقد طلعتي كل اللي في قلبش عليا مشتيش نجلس هكذا يكفي الاسبوعين اللي مروا

امان: اللي في قلبي عليك كثييييير وعادي اقدر اخليه في قلبي قدنا متعوده

خالد : لييييييش تخليه في قلبش هوذانا عندش قولي اللي تشتي صيحي خرجي ضبحش اهم شي ماتجلسيش هكذا بين احس انو انا السبب

امان : اكرهك....ووجودك في حياتي مضايقني ومطلع نفسي ارتحت !

خالد مسك يدها : عادي كملي مستعد اسمع كل حاجه وبعدين ليش ايش اللي اتغير الان تذكري اخر يوم لوما كنتي ايهم بكيتي وقلتي ان هذكه المرة اخر مرة تكوني فيها قويه اخر مرة تكوني فيها بخير قلتي ان مكانتي عندش كبيرة وانو عتفقديني من عيكون يساليش ويتحمل مزاجش قلت لش انا موجود في كل وقت واستمريت اكون صاحبتش عشان اخفف عنش اسمعش وانصحش واسمع منش تفاصيل يومش ماكنت اشتي تحتاجي لاحد والا تشعري بالوحدة وانا موجود والله مافعلت هذا كله الا عشانش ياحب افهميييييني وقولي لي ايش اللي اتغير الان ليش قدش حقوده هكذا وبتكرهيني كل هذا الحقد اللي في قلبش عشان اني كنت احاول اسعدش

امان سمعت كلامه واوجعها قلبها من تصرفاتها معه : خالد انا اسفة وللعلم لوما كنت ايهم كل اللي في قلبي على لساني وكل كلمة قلتها لك كنت صادقه فيها واعتبرتك اخي واهلي وللمرة الالف شكراً على كل حاجه فعلتها عشاني

خالد: يعني ايش

امان سحبت يدها : يعني ياخااااالد ابليز اشتي اروح

خالد رجع معاها للسيارة : طيب بس هاه مشتيش زعل بعدين سكان البيت العزيز عيعرفوا القصه

امان : اخر مره اقولها لك انسى كل شي واعتبرني موظفه وبنت عم بسسسس غير هذا لا

خالد: ولا عليش اوعديني تبطلي ضبح

امان : .......😐

خالد: عتوقف اوعديني

امان: وعد

خالد: هكذا الامور عتسبر

في البيت

افراح: كأن خالد وامان متتصايحين بتلاحظي تصرفاتهم

ريما: قد قال لي خالد هم تاعبين من العمل من الصبح للعشي

افراح : عتنزل اسمر مع امان وااحاول اسحب كلام منها

ريما : الله معش

امان بدلت واتمددت: طق طق

امان : اتفضل

افراح: مساء الخير

امان : حيا مساء النور اجلسي

افراح: كيف العمل معش

امان: سابر الحمد لله تعب شوية

افراح: قد اتوظفتي سكرتيره من قبل

امان عرفت ايش تشتي وبشيطنة  : ايوة

افراح: وكيف تعرفي العمل وانتي ماكملتي حتى دراستش

امان : درست دورات كمبيوتر وكنت اسير مع بنت جيراننا واكتسبت منها خبرات

افراح: امم ماشاء الله

امان: ........🙂

افراح : كم قد الساعه

امان شافت ساعتها : تسع

افراح:ولو فضول مني  ليش تلبسي ساعه رجالي

امان : حاليات الرجالي

افراح بغمزة: بس احس هذه الساعه لها قصة

امان : ولا قصه ولاحاجه هي هديه من صاحبتي

افراح: ليش ماتدي لش بناتي

امان: هي داريه انو يعجبني الرجالي وانا وعدتها مااخلسها

افراح: وفية ماشاء الله عليش

امان : اقلش حاجه

افراح: اتفضلي

امان ركزت في عيونها : حاسه ان وراء الاسئلة هذولا حاجه

افراح: يووو بنت عمي اشتي اجابرش بس

امان : بس انتي ماجابرتيني حققتي معي

افراح: يووووه مالش وليش عتحقق

امان : هذا الجواب عتخليه عليش جاوبي لنفسش جواب مقنع

افراح: فهمتيني غلط كل اللي اشتيه اتعرف عليش اكثر

امان : اعرف لغة العيون قووووووي وعيونش يشتين حاجه غير التعارف والمجبر

افراح: شكلي طولت يله ارتاحي نتجابر مرة ثانيه

امان: لو سمحتي غلقي بعدش



خبـايــا القلـ♥ـب


البارت #116#


افراح : تمام وطلعت لاعند ريما وهي بتحطم : يوووو لو تبسري حرام انها جنيه

ريما: اعوذ بالله ماقد وقع

افراح شرحت لها : هههههههه تستاهلي قلت لش مابش حاجه وانتي الفضول عيقتلش مابلا والا تكتشفي على قولتش

افراح: على عيون معاها بنت اللذينا

ريما: هههههههه عيس بطلي بعسسه بعد خلق الله

افراح: توبة ولا ازيد ابعسس يكفي هي صروعتني بكلامها يله اتخارجت منها

..........

ابراهيم: ادخل يابني

خالد : كيف حالكم

اسماء : بخير اجلس نتجابر

خالد : الصدق مش داري كيف ادخل في الموضوع

ابراهيم: اتحاكى هوذا بنسمعك

خالد: قدو وقت

اسماء :وقت ايش

خالد بخزا :  تـ خـ. تـ خــ  تـخـطـبـوا لـي🙊

ابراهيم فرح : خير مانطقت يابني ولك من تشتي

خالد: الخير فيكم

اسماء: قبالي بنت سع القمر اخطبها لك

خالد: مع اشتي اماان

ابراهيم: بنت عمك يوسف

خالد: ايوة

اسماء: بس ماقد تعرف طباعها سواء

خالد: عتعرفهاا بعد الزواج

اسماء: لك ماطلبت يابني والخير فيما اختاره الله عتقلها وابسر

خالد: غدوة مابش دوام قولي لها

اسماء: حاضر لاتقلق

خالد : تصبحوا على خير

ابراهيم : اسمر معانا

خالد: لا عترقد قدنا تاعب

اسماء: تمام دنيا حق مصالح

خالد: هههههههه خاطركم

ابراهيم : نخطب لماجد والكل قدو عاقل

اسماء : انا اشتي دعاء بنت اختي لماجد

ابراهيم : ادعيه نحاكيه

ماجد: والله مانا داري ايش اقول لكن قد انتوا اخبر

اسماء : نخطب لكم جمعه

ماجد: بعدكم

ابراهيم : خلاص عنبسر رأي البنات ونحدد يوم


اليوم الثاني

اسماء : كيف حالش يابنتي

امان بتجهز الغداء: الحمد لله

اسماء: ماعاد ابسرناش من حن بدأتي العمل

امان : ماافعل بين اسير الصبح واروح العشي وقدنا تاعبه مابين اتلوهش اطلع عندش

اسماء: الله يعينش ويريحش

امان: يارب


خبـايــا القلـ♥ـب


البارت #117#



اسماء: اشتي اجابرش في موضوع

امان: اتفضلي ياعمة

اسماء: في واحد اتقدم لش

امان: هههه من هو

اسماء: ليش الضحكه

امان: مدري خرجت من نفسها

اسماء: الله يديم الضحكه

امان : ابردي لش من هو سعيد الحظ

اسماء : خالد   خالد ابني

امان فلتت للصحن: ايش

اسماء مستغربة من حركتها : خالد ابني

امان  ضبحت وماسكه نفسها بالغصب: ياعمة انا اسفه بس مشتيش افكر في الموضوع حتى

اسماء: ليش

امان : فكرة زواج مادخلتها راسي وخالد بين اعتبره اخي لاغير

اسماء: براحتش يابنتي ماعتضغط عليش فكري في الموضوع

امان: طيب


على سفرة الغداء

عبد الرحمن : ماشاء الله يابنتي طبخش حالي

امان: تسلم ياعم

لطيفه : ضيعتيني هههههه

امان: تسلمي كله من ذوقش

خالد بيتغدا سكته

وجدان: للمه ريما مداومه اليوم

خلود: معاها اختبار

افراح: هو كان امس وهي اجلته لليوم مع بعض الطالبات

امان: الحمد لله شبعت

خالد قام قبلها يغسل : مسرع

امان: نفسي مسدودة

خالد: اوووف من ايش

امان: من الخبر الحالي

خالد: اهااااا امي كلمتش

امان بهررت له: وانا رفضت

خالد اتفاجأ مااتوقع ترفض:ليش

امان: مدري والله بدون سبب يله تحياتي

خالد ضبح منها دخل غرفته وغلق

افراح: مسرع بيشبعوا هذولا

ابراهيم: ههههه اخر من يجلسوا على السفرة واول من يقوموا

خلود: الرشاقه ياقمر مش مثلنا مانقوم الا وقد كملنا كل شي

وجدان: الله اكبر عليش صلي على النبي

ليث بيبسر صلا خلود : انتي لو توقفي عن الاكل عتنفرج الازمة اللي في البلاد

عمر مااستحمل : هههههههههه منين بتدي هذا الكلام يااخي

ليث : مجهود شخصي

ماجد: علمنا

ليث : حقوق الطبع محفوظة

اسماء: خلاص اتغدوا كل واحد لسانه اطول من الثاني


خبـايــا القلـ♥ـب


البارت #118#


خالد دخل غرفته واتصل لامان : ممكن اعرف ليش رفضتي

امان: مافيش سبب

خالد: طيب انا اشتيش

امان : مش بهذه السهوله

خالد: ليش تعقدي الامور

امان: اشتي اعيش وحدي

خالد: بس هذه سنة الحياه

امان: قلتها بنفسك سنة مشو فرض

خالد: فكري في الموضوع

امان: مش ناويه حتى افكر

خالد: كان على ايش ناويه

امان: ناويه اشتري سيارة وبيت واعيش وحدي بعيد عن الكل

خالد: عن الكل

امان: ايوووووووة

خالد: اتمنى تفكري في الموضوع

امان: اشتي فلوس البيت اللي بعته

خالد : نتكلم بعدا

امان: براحتك

خالد : فكككككري ياحب

امان: تحياتي وقفلت

خالد: ياربي صبرني على هذه البنت

ابتسام بتجابر اختها اسماء في التلفون : وافقت البنت وان شاء الله الجمعه الجايه

اسماء: فرحتيني يااختي

ابتسام : هو نصيب سبحان الله

اسماء : يله مع السلامه اسير ابشرهم

ابتسام: في يد الله

اسماء:  دعاء وافقت وقالت الجمعه الجاية الخطوبة
ابراهيم : وامان ماقالت

اسماء بزعل : ماتشتيش

ابراهيم: لاتضغطوا عليها خلوها براحتها

اسماء: خلاص نخطب لماجد

 ابراهيم : قد قلتي لخالد

اسماء: عتقله الان

ابراهيم: قولي له هو نصيب واللي مقدره الله عيصير

اسماء: الله يعين مادام وهو اختارها من نفسه اكيد عيزعل💔

ابراهيم: مانقدرش نغصب البنت

اسماء:خيييييييير

خالد وهو ممدد يعني شبه راقد ضابح من تعامل امان معه ومقهور عليها في نفس الوقت :ادخلي يمه

اسماء دخلت غرفته وغلقت : والله مااقلك الا كل خير يابني هو نصيب

خالد: لاعاد تكمليش قدنا داري

اسماء: سهل ياابني البنات ملان

خالد: مااشتيش زواجه اخطبوا لماجد

اسماء: يابني لاتقهر نفسك وهي خليها براحتها

خالد: قوا يمه خلوني لحالي فيني نوم مش انا مقهور ولا في حسي منها براحتها وماعتغصبهاش 💔

اسماء: ارتاح يابني والدنيا كلها اقدااااااار

خالد: راااااضي بها

اسماء اقتهرت على ابنها وسارت لاعند امان تزيد تحاول تقنعها : طق طق

امان بتمثل انها راقدة وماردتش  :........

اسماء فتحت ابسرتها راقدة وغلقت

امان بتحاكي نفسها :اسفه ياعمه بس اشتي اجلس وحدددددي

خالد خرج العشي يلوي ومارجع الا متأخر




خبـايــا القلـ♥ـب


البارت#119#


خالد خرج العشي يلوي ومارجع الا متأخر

امان ماقدرت ترقد من معدتها جالسه بتئن في غرفتها سمعها خالد وافتجع عليها : طق طق

امان استغربت من اللي عيكون صاحي لاهذا السع:ادخل

خالد: امان انتي بخير

امان بتعب : ايوة

خالد: امااااان من متى بغير اكل

امان : من امس

خالد: معدتش بتوجعش من الجوع يامجنونة

امان بتكابر : قلت لك انا بخير

خالد: قومي البسي اشلش المستشفى

امان : بين اقلك مابش فيني شي

خالد : مش وقت الدلع

امان دوخت: .......

خالد: ياربي بختي انا وهذه البنت ماتدوخ الا عندي وحمل يصحي ريما

ريما : تااااااعبه ياخالد والله مافيني ماتشتي مني هذه السع

خالد: ريما امان مدوخة انزلي من الخيبله مايسبرش اشلها وحدي

ريما صحصحت : يله هوذا عتنزل

امان بالعافيه نزلت للسيارة : اااااخ

خالد بيسوق بسرعه والمستشفيات مغلقات قدو يائس: يااااااربي كلهن مغلقات

امان: اخ معدتي خالد الله يخليك سوي لي شي ماعتقدرش اتحمل اكثر

خالد قد قلبه عيقرح عليها: ريما انتبهي لها

ريما في الحلم السابع راقده من حن خرجوا

خالد ذكر ان معه حبه في جيب الجاكت: اماااان اشربي هذه

امان مدوخه فوق الكرسي

خالد وقف السيارة واستوى صليها وهي مدنيه راسها :امان اشربي هذه قوا

امان: .......

خالد  بعد لها اللثمة وشربها الحبه بالصميل: خلاص ياحب عتهدأي شوية

امان : اشتي امييييي

خالد : امان امش ماتت الله يرحمها
انا امش وابوش وكل حاجه

امان : انت خليك بعييييييييد مني

خالد: طيب اللي تشتيه ورجع بقعته يدور مستشفى مفتوح

امان: يممممممه وينش

خالد بعد ساعه لقي مستشفى : ريما ريماااااا قومي نزليها معي

ريما راقدة ولا في حسها :..........

خالد: استغفر الله والثقاله اللي فيها هو وقت النوم ذاحينه

امان: عتنزل وحدي

خالد : فتح لها الباب ونزلها

امان: قلت لك خليك بعيد

خالد:ماعتقدريش تخطي خليني اساعدش

امان : مااحتاج مساعدة

خالد:  مشو على كيفش تشتي تدوخي في الشارع
وتتبهذلي

امان خطيت شوية وماحست بنفسها الا وهي تنكع للقع

خالد شلها في يداته ودخلها للطوارئ وهي كانت ماسكه بحقه الجاكته وبتهلوس: يارب ساعدني تعبتتتت

خالد طرحها وفحصتها الدكتورة :ها دكتوره ايش فيها

الدكتورة : جرثومة في المعده

خالد : والحل

الدكتورة : ضروري رقود عشان اول شي نفعل لها مغذيه وبعدا نبسر مانفعل لها

خالد: طيب

الدكتورة: ايش تقرب للمريضه

خالد: ولد عمها

الدكتوره: وين ولي امرها

خالد: انا ولي امرها امها وابوها متوفيين

الدكتوره: خلاص جي بعدي وقع الاوراق

خالد وقع : انتبهي لها عتخرج وارجع بسرعه

خالد سار للسيارة يصحي ريما : ريما قومي ارقدي مع امان هي تاااااعبه

ريما : وين احنا

خالد: في المستشفى قووومي

ريما : يله سحبت نفسها للغرفه شافت امان ورقدت فوق الكنبة




خبـايــا القلـ♥ـب


البارت #120#



خالد: ايش يلزم يادكتوره

الدكتورة: هذه الحبوب اذا قامت ادي لها تشربهن والمغذيه غيرها لوما تفضى

خالد: مشكورة ورجع الغرفه عند البنات مابش بقعه يجلس سحب له كرسي وجلس جنب امان  اتذكر يوم مرضت في بيتها وهو جلس عندها قامت وقالت له يروح اتذكر من اول مادخلت الشركة  ويوم علمها السواقه والرمايه اتذكر اول مرة مرضت في الشركة وهو يشتي يساعدها وهي ترفض

امان: ااخ وين انا

خالد: في المستشفى

امان: لييييش

خالد: طبعاً لانش
مهمله باكلش وفيش جرثومة بالمعده

امان : وين ريما

خالد: هوذه موجودة بس راقده مش وقتها ذاحين اشربي ذولا الحبوب

امان: يخ مشتيش

خالد: امان مشو على كيفش هو علاج مش لعبة

امان: مشتيييييش وبس

خالد: عتغصبش عشان صحتش

امان : لاتقرب مني  خليك بعيد

خالد: انا ولد عمش مش انا واحد من الشارع رجاءً بطلي هذه الكلمة ولوما تتعافي وبعدا افعلي اللي براسش مش وقت العناد

امان قفت وجهها : مشتييييش

خالد شربها بالغصب : ان اسف بس عتشربيها عشان صحتش بطلي العناد حقش

امان: مشو عناد

خالد:  كان ماهو ابسري كيف عاندتي ماخليتيني اساعدش و دوختي وسط الشارع وبالاخير شليتش وغصباً عنش وازيدش من الشعر بيت مارضيتي تفلتي لحقي الجاكت

امان خزيت وقفت : ليش اديتني لاهانا

خالد : لانش بنت عمي ومن واجبي افعل هكذا

امان: لو كنت مكانك كنت عتخلي لك حالك وما اتفيضل

خالد: حتى لو رفضتيني مايعني اخليش تموتي مكانش حسب الله وكنتي اقصد كنت اغلى شخص بالنسبه لي وانت عارف بهذا الشي

امان: لاتكلمني كأني ولد فترة عشتها وعدت الحمد لله

خالد: لكنها كانت الاجمل بالنسبه لي

امان: ممكن توطي صوتك عشان الاخت ما تصحى

خالد: اتطمني هذه لو ابترع شقها ما تصحى

امان: عرفت انني امان قبل فترة طويله ليش ما تقلي

خالد : لانو ببساطة مشتيش اخسرش

امان: كل الناس يتعوضوا والحياة ماتوقف على احد

خالد: هذا بالنسبه لش بالنسبه لي محد يشل بقعة احد وكل شخص ترك أثر بطريقته الخاصه

امان: مافكرت في يوم من الايام ليش بين اتعامل معك بهذكه الطريقه ليش بين ابعد منك ليش واصل بهذكه الملابس ليش مشتيش تقلي ياحب والا تحبني

خالد: فكرت بكل شي الا انش تكوني بنت صح ان لبسش وتصرفاتش كانت في قمة الغرابه بس مااتوقعت بنت تسوي هكذا

امان: يعني غلطانه لما اشتغلت واعتمدت على نفسي

خالد :لا طبعاً بس في مجتمعنا مااعتقد انو يسبر

امان: الظروف ألزمتني اشتي اعتمد على نفسي كم عتجلس عند امي تصرف عليا

خالد: مش عيب العمل العيب انش تلبسي هكذا

امان: مالقيت عمل لانني كملت بشهادة ابن امي ايمان يعني اتوظف بشهادته

خالد: سبحان الله كيف اداش لاعندي

امان: ماكنت ناويه استمر هكذا اذا مالقيت اهلي

خالد: وانا كنت ناوي امسكش ولا افلت لش الا لوما تبرري لي تصرفاتش

امان: قد ربي ستر

خالد: الان ارتاحي وبعدا يحلها الله

امان: شـكـراً اسـتـاذ خـالـد

خالد: قلت لش الف مرة انا خااااااالد وبس