روايات يمنية جميلة جدا خبـايــا القلـ♥ـب19

خبـايــا القلـ♥ـب


البارت #109#



افراح: دورنا نقوم نجنن هيا

ابتسام ولطيفه بيحجرين لهن : لولولولي

ام اسامة : ماشاء الله عليهن وقعين حاليات

اسماء: حياكم الله

ام بدر خطيب ريما: الله يحييش يااختي

النسوان جالسات يتجابرين ويتعارفين والبنات يرقصين ويجننين

كملت الحفلة على خير والكل مبسوط لافراح وريما


بعد العِشاء

لطيفه: هيا بنات جين عشاء

خلود: محد جاوع

امان : انا عتنزل ارقد تصبحين على خير

لمياء: عادو بدري مسرع بترقدي

امان: مش متعوده على الضجة قد راسي بيوجعني

دعاء: الله معش

امان نزلت غيرت ملابسها واتمددت : اووو جحفه نسيت مااجاوب خالد

خالد ابسرها دخلت غرفتها وسار لاعندها : طق طق طق

امان جلست سواء : ادخل

خالد : منتظر لش من اول

امان: نسيت والله العفو منك ادخل في الموضوع وخلي الغرفه مفتوحه

خالد دخل وغلق وجلس بعيد منها: اول شي مش انا واحد غريب انا ابن عمش وثاني شي ماعد قلتي من العمل

امان: اممم موافقه

خالد: حالي بس عندخلش مثل اي موظف

امان: كيف

خالد : عنفعل لش عقد عمل لمدة سنة ماتقدريش توقفي الا لما تكملي واذا حبيتي العمل وتشتي تستمري نجدد العقد

امان : اوووو سنه بكلها

خالد: ماعتحسي بها وبعدا العمل معي محد يمل منه

امان: هههه ايش الثقه العمياء

خالد : ابردي لش من الثقه ذاحين ايش قلتي

امان: طيب من غدوة عتداوم

خالد: يلا تصبحي على خير

امان: وانت من اهله


مرت شهرين امان بدأت العمل والبنات كلهن بيستعدين للاختبارات
خالد ساعه يلمح لامان انو عارف بحقيقتها وساعه يقلد هباله
امان مستمرة تتواصل مع صاحبتها المجهوله وكل يوم والموضوع يدور عن خالد
ليث اصبح شخص غير الاول اتحسن مستواه الدراسي واصبح اجتماعي مرح واهم شي ملقوف وبقوووة
عبد الرحمن سافر هو ولطيفه اسبوع يغيروا جو افراح مستمرة في مراقبة امان وخالد


في العصر الكل مجتمعين بيتجابروا معطلين مفتهنين

خالد:  ايش رأيكم نخرج نغير جو

ماجد:انا عتسير ذاحين عند اسامة قد قلت له

عمر: وانا والله معي مذاكرة راكمتها لليوم

افراح:  مادخلنا منهم قوا ياخالد خرجنا

ريما: الله يحفظك قبل ما تبدأ الامتحانات

خالد:  يله البسين

في السيارة

امان: وين عنسير

خلود:  انا ووجدان وليث نشتي الحديقه

خالد:  خلاص انا عاد اطرحكم هانا ونسير انا والبنات بقعه قريبه من هانا اوبهوا بنفسكم وخلي تلفون افراح معش

وجدان:  ادي لنا زلط

ريما:  واحنا وين عتشلنا

خالد:  بقعه ثانيه

افراح : خلود خليش عاقله كما قدش الكبيره بينهن م اوبهي لهم وخلي التلفون مفتوح

خلود مسكت يد وجدان وليث وفحطوا

خالد وصلهن للبقعه اللي يشتيها:  من يعرف هذا المكان

ريما: مااحد

خالد : وانتي ياامان ماقد جيتي انتي وخبيرتش لاهانا

امان بتتغيبى: ماشي اول مرة اجي

خالد: يله انزلين عتعلمكن الرمايه

خالد:  يله انزلين

البنات نزلين وامان جلست مترددة وبالاخير قررت تنزل عشان تبين لخالد انه مابش شي

ريما: انا الاوله

خالد وقف وراها ومسك معها بالمسدس:  ايوه هكذا خليش ثابته واطلقي

ريما اطلقت وافتجعت:  يووو يما يداتي خذلين ماعاد اشتيش اتعلم يفجع

افراح:  دوري انا  اخري انتي يافجيعه

ريما: جربي حظش وعنبسر اذا مابكيتي من الفجيعه

افراح : ماعليك منها ياخالد ايش افعل علمني

خالد بيوريها كيف تفعل وامان بتتفرج وتذكر لوما  علمها الرمايه وكيف قلبت عليه ذيكه اليوم

افراح اطلقت ونكعين بطونها: يووووو ماعاد اشتيش الصدق والله انو يفجع صدق انصحش ياامان لاتجربيش

امان: عادي اجرب وابسر

ريما:  انا عتسير اشرب ماء من السيارة

افراح: انتظري لي والله ان قد فيني عطش ياساتر


خبـايــا القلـ♥ـب


البارت#110#


خالد: دورش ياامان

امان بتحاول تخلي نفسها طبيعيه وياسعم اول مرة تمسكه : ماهو هذا كيف افعل به

خالد كاتم ضحكته من حركاتها:  الله يرضى عليش امسكي هكذا

امان: ايوة وبعدا ماافعل

خالد واقف وراها: مسرع نسيتي عادنا علمتش

امان ارتبشت بس مابينت: سلامتك ايحين علمتني

خالد: ابردي لش يله اطلقي

امان ماسكه المسدس وهي بتتذكر يوم علمها الرماية كيف فعل بها وكيف كان قريب منها اتوترت ونكعت المسدس للقع

خالد: بسم الله مالش نكعتيه

امان شلته وبتحاول تنسى هذكه اليوم حددت الهدف وبتحاول تجمع تركيزها بس ماقدرتش بترتعش بس

خالد قرب منها ومسك المسدس بيد والزناد بيد:  اذا نسيتي متى علمتش ماعتنسيش هذه الحركة يله اطلقي

امان: مالك من الجنان ابعد من خلفي وبعد يداتك اوجعتني

خالد : ماهو من جنان بين اعاملش مثل افراح ووجدان مابش حاجه غريبه يله اطلقي لاننا ما عتبعدش الا لوما تصوبي الهدف

امان قد بتحسه قريب منها قوي : طيب ابعد شوية والا رخي يدك ماقدرت اتحرك

خالد: نهائياً يله اطلقي ضيعنا الوقت

افراح:  ياريما والله انني احس انهم يتعارفوا من قبل ابسري كيف بتتصرف معه

ريما : ايش قصدش

افراح : احس ان بينهم شي

ريما بنبرة حاادة :  عادي مثلش انتي ووجدان وبعدا لاتنسي كلنا اخوة

افراح : جي نبسر كيف عتطلق وسارين وقفين وراهم وهم مش داريين

خالد:  اطلقي يله من ايش الخوف ياسعم ان هي اول مرة

امان: ايوة اول مرة واطلقت واصابت الهدف

خالد: سبحان الله نفس المرة الاوله بالضبط

امان التفتت له تشتي تنكر اللي بيقول وابسرت ريما وافراح وراهم:  اين مرة واين طلي

افراح بتهمس لريما:  سمعتي ماقال نفس المرة الاوله حرام انهم قد التقوا من اول لاذمتي

ريما : بس امان بتنكر كل اللي بيقوله ومابش حاجة من طرفها تبين لنا انهم متعارفين

خالد رفع اللوح والمسدس ورجعوا للحديقه : ريما انزلي معي نبسر وين هم وافراح تجلس هانا هي وامان

ريما نزلت وغلقت وجلسوا يدورا للعيال: خالد اسألك سؤال وماتخبي عني الحقيقه

خالد: اسألي

ريما:  انت تعرف امان من قبل ماتجي للبيت

خالد:  ههههههه لو اعرفها انني حكيت لش عنها والا بالله عليش منين عتعرفها

ريما: ليش انتوا لابسين ساعات سواء وكل سع تراجم لها الكلام مراجمه

خالد بغباء: صدق هي لابسه نفس ساعتي ماقد ركزتش يمكن تكون صدفه اما مراجمه الكلام لانها لقنه وتستاهل

ريما اقتنعت بكلامه

ليث : مسرع عاد احنا ماقد لعبناش سواء

خالد : سهل الايام امامنا عنرجع نخرج مرة ثانيه

وجدان : يله نروح والله ان ارجلي قدهن مكسرات

خلود: هو عمل الملاحقه ههههههه

في السيارة

افراح: امان بين احسش تتصرفي مع خالد غير معانا كلنا ليش

امان : بيتخايل لش والا تصرفاتي هي واحده للكل

افراح:  يله خير

طول الطريق وامان مطننة بتفكر في اللي حصل وخالد كل سع يبسرها من المراية

عمر: حيا حيا  كيف كانت خرجتكم

ليث : حالية تجنن ولااروع

لطيفه:  يله سيروا صلوا وارتاحو وجوا  اتعشوا




خبـايــا القلـ♥ـب


البارت #111#

بعد العشاء سامرين عند مسلسل يتابعوه كلهم

ليث : خالد ادي لي تلفونك الثاني العب

افراح : ابسر معانا الفلم والله انو حالي

ليث: بتسير الترجمة وانا ماقد كملت اقراها بين ازاوط نفسي مزاوطه وما قدرت

عمر: خلاص اسكتوا خلونا نبسر

خالد: هه انتبه تبعسس العب وبس

ليث جلس شق امان: امان وريني كيف العب هذه

امان: هكذا وبتوريه

ليث : خلاص فهمت

امان فتحت تلفونها  وبتراسل صاحبتها بس ما بترد اتصلت لها وبتجابر نفسها : ولو انش ماعتجاوبيش لكن محاولة عشان تفتحي الوتس

ليث : خالد مدري من بيتصل لك

امان شافت وانو رقمها انصدممممممممت

خالد ارتبش: ليث هات التلفون من بيتصل

امان ابسرت لخالد بقهر و قامت غرفتها وجلست تبكي : معقووووولة يكون خالد اللي بيكلمني معقوله هو اللي ساعدني القى اهلي 💔معقوله كل اللي حدث لا ياربي ليش هكذا

ريما : مالها هذه البنت

ليث : مدري

خالد شل تلفونه وسار غرفته : ياالله انا ايش فعلت خلاص عرفت من انا ايش عيكون موقفها مني انا اصلاً اخبل والا ليش اديت له تلفوني ليش ما انتبه ليش ما اصمته اوووووووووو بس ايش اسوي💔 اعتذر لها افهمها ههه هذا اذا رضيت تحاكيني

امان : ليش مافكرت انه هو ليش قلت له بكل شي ليش ماكنت حذره

خالد سار لاغرفتها دخل وغلق وهي بتبكي ومغطيه على وجهها : امان

امان : ليش جيت اخرررررج من عندي عاد لك عين تجي لاهانا

خالد : امان انا ا

امان قاطعته : لو سمحت خليني لحالي

خالد رجع غرفته وانتظر شويه لوما تهدأ واتصل لها : الو

امان فتحت وجلست ساكته

خالد : امان اسف بس كل شي سويته عشانش اشتيش تتعرفي على اهلش وتعيشي معاهم اشتيش ترجعي مثل اول وتبطلي حياة الرجال والله كله عشانش ومالقيت الا هذه الطريقه🤷🏻‍♂

امان: ........😑

خالد: افهميني والله ماقصدي اكذب عليش وامثل دور بنت اساساً ماكان امامي الا هذه الطريقه

امان : بس كذب واعذار وغلقت في وجهه

خالد : ياربي ايش افعل كيف عتفهمني وهي عناديه هكذا☹

لطيفه: طق طق

امان: ........

لطيفه : امان افتحي لي

امان مسحت دموعها وفتحت : حياش الله ياعمة ادخلي

لطيفة دخلت وغلقت: امان مالش

امان : ولا حاجه

لطيفه وليش قمتي من عندنا وجيتي هانا وليش بكيتي

امان: ذكرت امي ....💔

لطيفه: هوذنا اعتبريني امش اللي متضايقه منه قولي لي

امان : ........😐

لطيفه : خلاص ارقدي الان وارتاحي🛌🏻 واتذكري كله قضاء وقدر

افراح : ايش رأيش نجلس اليوم احنا وامان

ريما : معي غدوه اختبار

افراح: نفسي نسألها وين كانت عايشه  لوما نعرف ايش علاقتها بخالد وليش الساعات سواء

ريما: امان كتومة ماعتتحاكاش هذا اذا اللي في بالش صح والا انا قد سألت خالد وقال مايعرفها واقتنعت بكلامه

افراح : متأكده انهم يتعارفوا من قبل ما تجي البيت

ريما: لعبتي براسي يالعبيه خلي البنت في حالها🙃

افراح: طز عتستكشف وحدي اذا ماتشتيش

ريما: ايش رأيش نسأل ليث اذا قالت له بحاجه

افراح: وهذه فكره عتسير ادعيه

ليث : خدمات اوامر اطلب اتمنى

ريما: تشتي شكلاته

ليث : يانعمة الله دومي ومن عيرفض الشكلاته

افراح: بس مش بلاش

ليث: انا حراف

ريما: اسمع من الملاقفه

ليث : اقطبي وقتي مزدحم

افراح : اممممم انت وامان اصحاب صح

ليث : ايش المطلوب من الاخر لاتلفي وتدوري😒

ريما: كنا نشتي نعرف اين كانت عايشه

ليث: ليش

افراح: مجرد سؤال

ليث : انا وهي اصحاب والاصحاب مايخرجوش الاخبار يااخواتي العزيزات والشكلاته مشتيهاش😒

ريما: ماقصدناش تخرج اسراركم بس نشتي اعرف

ليث : احنا اتفقنا محد يخرج الاسرار ومرة ثانيه اذا طلبتين هذا الشي مني شاتصرف تصرف ثاني

افراح: خلاص اتوكل

ريما : اعوذ بالله على ولد واللقانه فيه

افراح: اصه اصه هذه فكرتش يا قمر

ريما : قصدي انو مسكين

افراح: هاتي الشكلاته على الاقل استفيد منش حاجه😪

ريما : ماعه وعادش تتليقفي

افراح: دوري خطة بديله

امان جلست تقرا محادثتها مع خالد على اساس انها صاحبتها وجلست تلوم نفسها ليش مافكرت مجرد تفكير انو ممكن يكون خالد اللي بيراسلها




خبـايــا القلـ♥ـب


البارت#112#



صباح جديد🌞

لطيفه : مالش يابنتي اصتبحي

امان : مابش نفس

لطيفه: وانت مالك مطنن اصتبح

خالد: ولاشي ياعمة مابش نفس والكل

امان : انا عتسبق للسيارة

لطيفه: اشتري لها صبوح معك

خالد: ولا عليش ياعمة لاتقلقيش

لطيفه : الله يعينني مدري مالهم هذولا

خالد اشترا لها سندوتشات :هه اصتبحي في الشركة

امان : مالي نفس

خالد: امان لو سمحتي عشانش

امان: اساساً انا ماجيت الشركة الا لانني ودفت ووقعت على عقد مدته سنه

خالد: امان أ أ أسف

أمان: لاتفتح الموضوع يله متحمله اني موجودة معك🙃

خالد: طيب اللي تشتيه بس اصتبحي

امان : عتشتري لنفسي مااشتي حاجه منك

خالد: الكفتيريا ملان رجال

امان: عادي انا كنت رجال قبل أشهر وعلى فكرة كنت ارجل منك الان😒

خالد بصياح : بسسسس ياامان الزمي حدش

امان: مش كل من تنكر كان ناجح يااخ خالد قصدي يااخت

خالد: امااااان بس وحاسبي على كلامش

امان : خاطرش يا صاحبتي نزلت ورصعت باب السياره

خالد: طزززز تصطفل

محمد : صباح الخير

خالد: .......😐

محمد: يااستاذ صباح الخير

خالد بضبح : صباح النور ارتحت الان

محمد افتجع : اووه العفو بس به ملفات يحتاجين توقيع

خالد: طيب اطرحهن واخرج

محمد سار لاعند امان :ماله خالد

امان: مادراني عالمه الغيب انا

محمد : انتوا عيال عم وبنفس البيت صح

امان بضبح : مادخلني منه عفواً منك بس معي عمل

محمد بيجابر نفسه : الله يستر مدري مالهم بيتقارحوا


نرجع للبيت

لطيفه: ياختي مارضيوش يصتبحوا

اسماء: كل واحد عقله في راسه وعيصتبحوا في الشركه

لطيفه:كل واحد بيتحاكى من نخره وقالب قز

عبد الرحمن: شكلهم ضبحوا من العمل

لطيفه: الله يعينك

خبـايــا القلـ♥ـب


البارت#113#




في الشركة تقريباً الساعة خمس العصر امان حاولت تنجز عملها تشتي تخرج:  محمد لو سمحت كلم الاستاذ خالد كملت عملي وخرجت

محمد : حاضر عتطلع ذاحين لاعنده واقله

خالد:  متى خرجت

محمد: الان شكلها ضابحه

خالد،شل مفتاح السيارة وخرج: محمد انتبه للشركة انا عتخرج واذا قدرت ارجع عتتصلك

محمد: ولايهمك يااستاذ

امان بتخطى في الشارع ومش هي داريه اين تسير بتخطى وبس مادريت بنفسها الا وقد هي في المكان اللي كانت تسير هي وخالد لاعنده دائماً

خالد بيخطى بعدها بالسيارة وقف ونزل بعدها ومش هي داريه انه موجود

امان ابسرت المكان فاضي ومابش فيه احد جلست وارتزحت عرض الشجرة وبتقرا حقها المحادثة مع خالد:  اووووو كم انا غبيه ليش مافكرتش انه خالد ليش كانت اقله بمشاعري تجاهه واتكلم عنه واصل ليش وثقت به واعتبرته اخي واهلي وكل حاجه في حياتي ليش استغل ضعفي وحاجتي لعائلة وخدعني ليش فعل نفسه بنت اكرررررررهك ياخالد يمه وينش يمه فقدتش خيرات ماعاد احد بيفهمني

خالد واقف وراء الشجره وبيسمع كل شي وكلامها اوجعه وحس بتأنيب الضمير وبصوت مبحوح : بس ياامان والله مايوم استغليت ضعفش وحاجتش للعائلة كل حاجه فعلتها عشانش وفي البداية لله ماشكيت حتى شك انش بنت كنت اعاملش مثل صاحبي صح كنت مستغرب وبقوة من تصرفاتش لكن كنت اقول دائماً طبيعته

امان سمعت صوته ونكزت : خـ خـالد مابتفعل من ايحين انت هانا

خالد: من حين خرجتي من الشركة خطيت بعدش بالسيارة ووقفتها ونزلت لاهانا بعدش

امان:  مشكور على الحراسه ومشيت

خالد مسك يدها وسحبها : ارجعي لاهنا اسمعيني وخليني اشرح لش

امان:  فلتني ايش تشرح لي كل شي واااااضح

خالد:  امسحي دموعش واهدأي

امان سحبت يدها ومشيت:  شكراً مابش داعي

خالد:  خلاص لاتسمعينيش اطلعي فوق السيارة نروح البيت

امان:  عتخطى رجل البيت قريب ومشتيش ابسرك

خالد بيتحمل كلامها مراعاة لظروفها طلع فوق السيارة وجلس يخطى بعدها لوما وصلوا البيت

لطيفة :اهلاً

امان : بالمهلي ياعمة

افراح : مالش ياامان او تاعبه

ريما : شكل صورتش مجغورة

امان : تاعبه شوية من العمل

ماجد : وانت ياخالد شويه شوية لاتتعبها

خالد : هو غر هذه الايام بس عشان المشروع

ابراهيم : خير يله سيروا قوموا نصلي مغرب جمعه وبعدا نقرا قران قد لنا خيرات ماجلسناش كلنا بعد المغرب

اسماء : هو صدق كل واحد في عمله

عمر : يله قد اذن

صلوا وجلسوا يقروا قران كملوا واتعشوا وكل واحد سار لاراس عمله وبعدين رقدوا

 امان ماجاها النوم ضبحت وهي ممدده شلت تلفونها وخرجت الحوش تشم هواء وتحاول تفكر في موضوعها مع خالد

خالد سمع حركه في الحوش خرج يبسر مابه

امان جلست في الدرج كان الجو بارد وهي لابسه خفيف وبغير طرحه من البرد

خالد ابسرها من باب الباب وخرج معه جاكت لها وطرحه فوقها وجلس جنبها : مابتفعلي لهذا السع وحدش هانا

امان : اشتي اشم هواء

خالد : قد الوقت متأخر

امان : مافيني نوم ماقدرت ارقد

خالد : ماتفتجعيش وحدش

امان : للمه افتجع وبعدا في بيتي كنت اخرج حتى الفجر وطت راسها عشان ماتبكي

خالد : مشو حالي تجلسي وحدش واصل

امان : قد اتعودت طول عمري وانا وحدي وبعدين اين احسن اجلس وحدي والا مع ناس كذابين

خالد: امان انتي للان مااديتي لي فرصه ابرر لش موقفي وتصرفي معش مارضيتيش تسمعيني

امان بدات تبكي : ايش اسمع ياخالد عتتعذر انا داريه بك هذا وانا اعتبرتك اخي وكل شي ندمت اني جيت اقدم في الشركة واتوظفت عندك ندمت انني كنت معك واصل ندمت اني وثقت فيك اشتي ارجع لحياتي الاوله اشتي امي ايمان ترجع ونعيش انا وياها مثل ما كنا

خالد : هذا قدر الله ياامان وانتي ارضي به وادعي لها وشكراً على كل كلمه قلتيها انا للان وانا بين اتحمل منش كل تصرفاتش لاني غلطت معش

امان قامت :  والله انني اقتهرت منك قوي

خالد : طيب اجلسي نتفاهم اسمعيني للنهايه

امان : انا اسفه ياخالد مشتيش اسمع شي ودخلت غرفتها وغلقت

خالد دخل وغلق باب الحوش وسار يرقد




خبـايــا القلـ♥ـب


البارت#114#


مرت اسبوعين عليهم وهم متخاصمين وامان واصل في غرفتها وبعد العمل تسير للبقعه تيكه شوية وتروح البيت

خالد صابر عليها لانه اوجعها بتصرفه وماعاد يحاكيها الا في العمل بس


صباح يوم جديد على سفرة الصبوح

اسماء: مالش يابنتي ماعاد بتاكليش سواء هذه الايام قدش ضعيفه

امان:  مابين ارغبش بين اشتري لي من قبال الشركة واصتبح هانكه

لطيفة:  اذا احد غثاش قولي لي

امان : ماشي ياعمه محد غثاني

ابراهيم : خالد كيف العمل في الشركة واين وصلتوا في مشروع الاستاذ محمد

خالد حسه عند امان كل اللي فيها بسببه وماركز على كلام ابوه

ماجد دكمه : جاوب ابي من المصانجه

خالد انتبه لهم : هاه ماهو مابه

ابراهيم:  بين اقل لك كيف العمل والمشروع

خال ابتسم لأبوه : الحمد لله كل شي تمام يله خاطركم اتأخرنا على العمل يله امان

امان : تمام

اسماء : اشتروا لكم صبوح مااصتبحتوش سواء

خالد:  ان شاء الله شغل السيارة وفحطوا للشركة وكل واحد سار لا راس عمله


بعد الدوام

خالد: امان اتغديتي

امان بتبعسس بالكمبيوتر وماردت عليه : ........

خالد قدو ضابح من تصرفاتها معه : اماااان مش وقت الدلع اكلتي شي والا مع

امان بنرفزة : ماشي ارتحت

خالد : امان ليش قد احنا عشي وانتي مااكلتي شي لاصبوح ولا غداء

امان ببرود: خالد خليني في حالي معي عمل

خالد: الدوام كمل يله نروح وكملي غدوة

امان شلت الشنطه والتلفون وخرجت

خالد بيسوق وهو يفكر كيف يراضيها

امان: ماهو هذا الطريق

خالد: معقوله نسيتيه

امان : لا مانسيته حافظة له سع اسمي  بس البيت مش من هانا

خالد : اول شي عتاكلي وبعدا عتروحي

امان: قلت لك مافيش نفس

خالد وصل للبقعه اللي بيسيروا لها دائماً ونزل من فوق السيارة : عتاكلي عتاكلي وماعتتحرك من هانا الا وقد اكلتي

امان:  عتاكل في السيارة مرتاحه هانا

خالد فتح لها الباب وسحبها بيدها : بطلي مكابرة انتي قلتي ماترتاحي الا في هذا المكان يله جي نتعشى

امان عجزت منه خطيت بعده وجلسوا تحت الشجرة  اكلت السندوتش تغصاب : يله اكلت اتوكل وروحني البيت

خالد : اطلب طلب

امان : .........

خالد: يعني

امان وهي قالبه وجهها : اطلب

خالد وقف امامها : اسمعيني للنهايه

امان: .....

خالد: امان امش ايمان الله يرحمها قبل ما تتوفى مكنتني هذه الورقه ابسريها

امان قريتها وانصدمت:.........

خالد: سألت امي وابي اين بنت عمي قالوا مدري اتأكدت من كل شي وعرفت انش امان لو صارحتش وقتها انني داري انش امان بنت عمي اظن الدنيا عتتخربط عليش وعتنكري وماعترضيش تحاكيني وعتبطلي الوظيفه دورت طريقه ومالقيت الا اراسلش حاولت اساعدش بقدر المستطاع كله عشانش

امان: شكراً بس ماكان في داعي تستمر في اللعبه كنت عتوقفها من اول ما وصلت البيت

خالد: عارف بغلطي بس حبيت اخفف عليش ماكنت اشتي تحتاجي لاحد والا تكتمي في قلبش اي شي

امان : للاسف ماخففت بالعكس زدت الطين بله

خالد: ليش ضابحه الان

امان: عشان اعتبرتك صاحبتي واتكلمت بحاجات المفروض مااتكلم بها المفروض تجلس مكانهــــا❥!

خالد: امان انا ايش قلت حتى وان ماكتبتي لي شي واتواصلتي معي  انا فاهم وعارف بكل حاجه والله  امان انا قلت لاعاد تضبحي او تتضايقي اذا تحبيني

امان بدأت تبكي : انسى كل شي اصلاً الغلط من عندي

خالد: انتي شخص مكانته كبيررررررررره في قلبي

امان: علاقتنا علاقة عمل وبس غير كذا مااسمح لك

خالد : امان انا خاااااالد عارف بكل حاجه حتى وان ماقلتي لي وكل ماكنتي تكتبي حاجه عن خالد انا كنت اعرفها ايش الفائدة الان للضبح

امان : عشان اتعلم من اخطائي

خالد : ليش اللي قلتيه عني خطأ🙃

امان: اعتقد لو جلس الكلام في مكانه❤ بيكون الوضع احسن

خالد : محد يعرفش اكثر مني اعرف كل شي حتى النظرات ولغة العيون

امان: مافرقتش تعرف والا ماتعرفش كل شي ماعاد يهمن