خبايــا القـلـــــــ 1 ـــــــب

السلام عليكم ورحمة الله وبركاته

جيت لكم بروايه جديده حاااااليه قوي و اتمنى انكم تستمتعوا بالرويه ولما تكملوا منتظر اسمع رأيكم ما شاطولش
 شبدأ التعريف بالشخصيات


أمان 18سنة بنت طويله رشيقه قمريه عليها الحلا والقبلة ماشاء الله تحب الروايات والموسيقى هادئه مع العقال ومجنونة مع المجانين

البنت مقطوعه من شجره ابوها وامها اتوفوا في حادث اهلها محد رضي يكفلها ربتها جارتهم وانتقلوا لحارة جديده محد يعرفهم فيها

الجاره اسمها ايمان مطلقه معاها ولد واحد بعمر أمان درس لتاسع وعمه سفره الخارج يواصل تعليمه وياخذ الدكتواره


ابراهيم وعبد الرحمن اثنين اخوه ساكنين في نفس البيت هم ونسوانهم وجهالهم


ابراهيم المسؤول الكبير بعد الوالد الله يرحمه رجال ناجح بحياته وموفر لعائلته كل شي بس عيبه الوحيد جشع مايرضى يتصدق او يخرج مال للفقراء

مرته اسماء مره حبوبه حنونه اولادها كل شي عندها


عيالهم

الاخ الكبير خالد 21سنه كمل الدراسه بتفوق طويل ابيض شعر قصير وكيرلي اسوووود سواد الليل ذوااااق واهم شي اطيب من ابوه

الاخ ماجد 18سنه حياته يله يله ماهمه شي لادراسه ولا عمل كل حياته لعب ومصياعه خرجه دخله تخزينه وسمرة

عمر 13سنه حبوب كيوت يقلد خالد في كل شي ويشوفه قدوته خزوووووي حتى من خواته


البنات
ريما 20 سنه بعد خالد كملت الثانويه وسنه جلسه في البيت والان سجلت جامعه تصميم ازياء


خلود 16 سنة دبدوبه جريئه لسان متر ونص ماتخلي لاحد حاله افكارها جهنميه يعني ماتميل للبنات ولاحتى واحد في المية تصرفاتها تصرفات عيال🤩



الاخ الثاني عبد الرحمن اصغر من ابراهيم بشويه رجال كسووول معتمد على اخوه في كل شي جالس واصل في البيت مابش له كلمه ولا هيبه لاعلى جهاله ولا نسوانه طبعاً مزوج ثنتين نسوان يحب الثانيه حب العمى لان هي اللي خلفت له


المره الاوله لطيفه مره مسكينه بعد حالها قمريه ومحترمة جمالها طبيعي وكل شي فيها حالي اتزوج عليها لان هي ماخلفت له لاحد الان ولا احد

المره الثانيه قرن ابليس اعوذ بالله اسمها نورا تكره كل من في البيت طبينتها وسليفتها والجهال ولاتشتي احد قبالها حتى جهالها ...متكبرة شايفه نفسها على ولا حاجه

بناتها  افراح عمرها 17بنت بعد حالها ماتحب المشاكل ولاتحب امها اصلاً هادئه معتمده على نفسها بكل حاجه وبالنسبه لاخوتها هي الام والاب وكل شي

وجدان 12سنه بريئه محترمه تحب افراح حب ياساتر:: وتستشيرها في كل امورها ماتخبي عليها شي:
ليث 9سنوات فيه طبيعه غريبه مايحاكي احد لا امه ولا ابوه ولااخوته: ولا احد واصل جالس وحده 🤐لاحد ان الكل قالوا عنه مريض نفسياً


اووووه نسيت🤦اياد 21سنه بعمر خالد يكره خالد كره الجن  فاشل في كل شي🙄 امه تعلمه المطابزه والمناقره
مايسد هو واحد كل سكان البيت يكرهوه:

يحاول يخرب على خالد كل شي: لان ابوه وعمه يشوفوا خالد كل شي ومعتمدين عليه دائماً


كملت التعريف بالشخصيات


تابعونا

خبايــا القلب

البارت #1#

خالد: يله يمه مع السلامة اسير ابسر العمل اسماء: مع السلامة ياابني الله يوفقك ريما: خالد الله يخليك ادي لي معك سماعات خالد : ههههه عادنا اشتريت لش وين سرتي بهن ريما : التذعين مدري ماوقع بهن خالد : خلاص ان شاء الله اذكرهن كل العائله مجتمعه فوق الصبوح🥘🥪 إياد: هيا اباه اشتي زواجه خلود: احه احه شرغتني:sleepy: ..ماتفعل بالزواجه او تشتي بنت الناس تجي تبزيك ابراهيم:عيب يابنتي مايقولوش هكذا هو اخبر بنفسه اياد: ياقمر خليش محترمه مثل اختش ريما لفت وجهها من عندهم وجلست تاكل سكته (ريما تكره اياد وهو قد صارحها انو يحبها ويشتيها) وجدان جالسه بتاكل سكته اسماء: وجداني ماهو هذا اللي في يدش وجدان شاافت امها بخوف: ولاشي ياعمه اوجعتها ماجد : بايش اوجعتيها قدهي خضراء وجدان بكيت:sob: وقامت من فوق الصبوح: قلت لكم اوجعتها وبس ماعليكم مني بعد الصبوح كل واحد سار لا راس عمله ريما بتداعي وجدان : وجداني جي لاهانا وجدان: ماتشتي مني خليني في حالي. ريما: جي اشتي نتجابر في غرفتي وجدان فرحت وحملت لاعندها: بسرعه امي لو تبسرني عتضربني ريما : سعليش ولا يقع بش شي ذاحين ماهو ذيه اللي في يدش وجدان : ......:disappointed: ريما: سعليش اتحاكي وجدان : ضربتني امي ليش اسير ارقد في غرفه خاله لطيفه ريما زعلت عليها: اووووه خلاص ياروحي عندي فكرة حاااااليه عتنسيش الغثى كله:smiley: وجدان بتمسح دموعها:اتحاكي ايش هي ريما سيري داعي افراح وليث وجيتوا بسرعه لكن وجدان : تمام

خبايــا القلب

البارت #2#

في الشركه خالد: بس يااخي مؤهلاتك مش كافيه نوظفك عندنا 🙃 ابراهيم : سهل ياابني نبسر له عمل مناسب لمؤهلاته خالد: يابه هذه هندسة معمارية مش لعبة ومابش الا وظيفه شاغرة بس عتديها لمن يستحقها والتفت لاعند الرجال : العفو منك ياخي الرجال شل حقه الملف وخرج ابراهيم:ماشاء الله عليك ياابني الان اقدر اركن عليك في العمل خالد : الله يحفظكم يابه ان شاء الله اكون عند حسن ظنكم ابراهيم : خلاص انا عتروح خالد : الله معك مأمون(عامل في الشركة): السلام عليكم يااستاذ خالد خالد: وعليكم السلام اتفضل مأمون : اتفقدت العمال كلهم عملهم حالي ماعدا ذيه السكرتير غايب يوميه خالد: خلاص نبسر عامل بدل وذيه الله معه مأمون : يله عتسير ابسر عملي خالد: الله معك في البيت افراح: اتحاكي بسرعه ماتشتي ريما: ايش رأيكم نكلم ابي وعمي ينقلوكم للغرف اللي شق غرفتي هن فاضيات ومنه نكون نسمر ونجلس جمعه ليث: ..........:neutral_face: وجدان:فكرة حاليه:smiley: افراح: امي ماعتخليناش ريما: هذه خلوها عليا اهم شي عنكلم ابي وعمي بعد العشاء البنات : تمام موافقات في الحارة ماجد : ياخي والله مانفسي بجامعه ولااشتي ادخلها ماكملت الثانويه الا غصب اسامة(صاحب ماجد): بس هكذا عتضيع مستقبلك ماجد : ابرد لك مني اليوم ايش رايك نسير نخزن في بني مطر اسامة: فكره حاليه (اسامة صاحب ماجد من حن وهم صغار بس طبيعته ثانيه عن ماجد محافظ على صلواته ومتفوق في الدراسة بالمختصر ناجح بحياته يحاول قدر المستطاع يغير من طباع ماجد الى الاحسن ) اسامة : لكن لاتحاكيش الخبرة نسير وحدنا نفتهن في ارواحنا ماجد: مااااع نسير جمعه اسامة : انا عتقلك بالمفتوح الخبرة ذولكه مش سابرين ابسر على حركات فيهم صياعه ولكاعه ملان الشوراع ماجد: اهم شي اني مابين افعلش مثلهم اسامة : من جالس جانس ياخبير ماعتدرا بنفسك الا وقد بتفعل مثلهم ماجد: خلاص نجرب اليوم ونبسر كيف عيوقع الوضع اسامة : سابر متواصلين

خبايــا القلب

البارت #3#

في البيت نورا من راس الدرجان: افراااااح وينش يابنت افراااح افراح نزلت بسرعه: ها يمه ماتشتوا نورا بصياح : مابتفعلي طالع؟؟بتضيعي الوقت صح افراح: ماشي انا حريصه على وقتي اكثر منش نورا : ما شاء الله قد بنتي بترادد اخطي اغسلي الملابس فيسع افراح وهي كابده: تمام حاضر لاتصيحوش وخطيت تغسل وهي تبكي من الصبح وهي تقشع شقة امها وتكنس وترفع قد ظهرها اعوج ريما: وجدان ..ليث لاتقولوا لامكم ولا شي لما احاكي ابي وعمي والا عتفعل لنا مشاكل وجدان : حااااضر ليث:.............:neutral_face: في الغداء :bento: نورا: ماجد اشتيك توصلني بعدا بيت اهلي خواتي مجتمعات كلهن ماناقص الا انا واشتي اسير وامسي ثلاثة ايام ريما بينها وبين نفسها: عادو احسن ماجد: ليش وينو اياد نورا: اياد ماعيروح الا الاالعشيه مدري مامعه هو وخبرته ماجد:اسف ياخاله وانا شااخرج مع خبرتي مقدرش اوصلش 🙂 ابرهيم: عبد الرحمن وصل مرتك بدل الرقده حقك واصل مخموع عبد الرحمن :تاااعب اليوم مافيني من خرج نورا: اوف ماهو هذا حقكم خالد: خلاص ياعمة انا شااوصلكم على طريقي .نورا: اوووه تسلم الله يحفظك

خبايــا القلب

البارت #4#

ريما همست لافراح : امي كلمت ابي وعمي قالوا عادي افراح : يس يحيا العدل وقالت لوجدان وجدان : اماااانه افراح : والله وجدان ندعت محجرة ملان البيت : لولولولو لي ماجد : اعوذ بالله مالش ياوجدان وجدان خزيت : هاه. ولا لي شي خالد: اعترفين مامعاكن لطيفه دريت انه عشان النقولة رجعت تغالط معاهن : بيتفقين عشان عرس صاحبتهن صح ياافراح افراح ضحكت : ايوووووة فدالش ياخاله مابتفهمينا الا انتي نورا ضبحت من افراح : غداء مش وقت الاتفاقات حقكن افراح مزقرعه من الفرح : يمه اليوم شااغسل لداتي انا واخوتي ووجدان عتعاوني نورا : انتين اخبر مادخلي:unamused: انا شااطلع اجهز لي لداه اسير افتهن بيت اهلي وجدان بهمس: مع ورور وكلب اعور خلود : طريق تشل ماترد لطيفه سمعتهن وبهررت لهن تعالوا معي لعالم ثاني :wink: آمان : يمه مع السلامه (بمنزلة امها هي اللي ربتها واعتنت بها) ايمان : الله يوفقش يابنتي ولو انني اشوف هذا العمل صعب عليش وانتي لابسه هكذا آمان : مافي شي يصعب عليا وبعدين قد هذه السنة الرابعه وانا متنكرة محد عرفني ولا عرف اني بنت آمان : كملي وظيفه امد ما توفري احتياجاتش وبعدا بطلي قد بين اخاف عليش الصدق آمان: الله الحافظ يمه دعواتش ان شاء الله احصل عمل مش مثل الصبح ايمان : ان شاء الله اوبهي لنفسش هه (آمان من اربع سنوات متنكرة بلبس رجال على اساس انها ابن ايمان كملت الثانوية منازل على هذا الحال ودرست دورات كمبيوتر ) آمان بتحاكي نفسها: يالله من الصبح وانا الوي على الفاضي مالقيت لا وظيفه ولا جدتي يخ تعبت وجلست فوق واحد من الكراسي جنب مبنى ضخم ويدها على راسها من الشمس وهي لابسه جاكت كبير و2بناطل عشان مايبين انها بنت خالد نزل من السيارة لفت نظرة الشخص اللي جالس على الكرسي بس مااهتم له دخل الشركة وقضى بعض الاعمال وخرج عشان يروح بدري يوصل خالته اتفاجأ ان الشخص جالس بقعته سار لاعنده: لو سمحت ياخي تحتاج شي أيهم(آمان) بصوت رجولي: لا مااحتاج شي تسلم خالد: بس استغربت قدلك جالس هنا خيرات أيهم : من التعب من الصبح ادور على وظيفه ولا لقيت خالد جلس شقه :وظيفة ايش أيهم ابتعد شوية : مابش معي الا شهادة الثانويه واخذت دورات كمبيوتر بس مالقيت وظيفه مابش معي مؤهلات الكافيه خالد ارتاح له خيرااات وفكر يشغله بدل السكرتير الاول : خلاص ياخي لا تقلق جي لي غدوة الساعه 10وماعليك الا وظيفه من عيوني الثنتين أيهم قفز من الفرحة: يوووو تسلم يااخ .... العفو بس ايش اسمك خالد : اسمي خالد ال .... وانت أيهم : انا ايهم تسلم والله مش عارف كيف اشكرك خالد : ماشاء الله عاشت الاسامي يله القاك غدوة أيهم : ان شاء الله شكراً مرة ثانيه خالد روح للبيت: هيا خاله قد انتوا جاهزين نورا: ايوة هوذا شااجي وتصيح ملان الدرجان وجدان وجدان جي نزلي معي الشنطه وجدان: تمام يمه امانتكم اجلسوا ارتاحوا عند جدتي كما تشتوا نورا: اقطبي هه خالد عيخطى عليا

خبايــا القلب

البارت #5#

ريما: يمه الجامعه حقي الاسبوع الجاي وانا اشتي بعض الحاجات اسماء : خلي خالد يخرجش ريما : يمه خالد مش فاضي وماجد واصل مع خبرته اسماء : يعني ريما : ادوا لي زلط وانا شااخرج انا وافراح وعمر اسماء: انزلي استأذني من ابوش ريما: حااضر وفحطت لاعند ابوها ريما:طق طق ابراهيم: اتفضل ريما : بابا امممم اشتي امم ابراهيم : اتحاكي ماهو اممم ريما : هههه اشتي اخرج اشتري بعض الحاجات للجامعه واخوتي مش فاضيين لي عادي اخرج انا وافراح وعمر ابراهيم : عادي بس لاتتأخروا ريما: اممم الحساب ابراهيم مكنها الزلط : فيسع لاتتأخروا ريما: ان شاء الله شكككراًً ريما : افراح وووووو يابنت افراح: مالش صلي على النبي قرحتي الطبلات حقي ريما : قومي نخرج السوق افراح: امانه امانه ريما: والله اسرعي وانا شااسير اقل لعمر يتجهز عمر: يووو ياريما مشتيش اخرج ريما: هيا عمر لو سمحت عمر: انتين البنات تطلعين الضغط تجلسين تلوين تلوين وتروحين فاضيات ريما: مع والله عتسرع مابش الا بعض الحاجات عمر: يله اخطي البسي عتنتظر في الحوش ريما: هيا افراح بسرعه عنتأخر افراح: يله من الهرم اصلح البوتي واجي

خبايــا القلب

البارت #6#

عمر بيصيح : قلت لكن انكن عتتأخرين هذا وماقد خرجناش ريما : هوذا جينا اخرج ابسر لنا باص مافينا من خطي يكفي خطية السوق عمر : يارب الهمني الصبر اخطين يله افراح : ماعتشتري ريما : بالطو وطرحة وبرقع شنطة وبوتي وبعض الحاجات افراح: اممم مادام عندخل سوق الملابس معي فكرة تجنن ريما : قولي افراح : اقربي ..ايش رأيش نطقم لنا كلنا شمزان ريما: كنتي عتقلي لي ازيد ادي زلط افراح : لاتقلقي قد فعلت حسابنا عمر: قوا لكن لاتتأخرين انا شاانتظر باب المحل ريما: ادخل بايع لنا عمر : مابش داعي ريما تشتي تعوده يكون يبطل خزا: والله ماندخل الا جمعه انت المحرم حقنا عمر قدو طماطيسه: ناهي هه اخطين ابسري كيف الدنيا ملان نسوان افراح : ماعليك منهن وانت ريما: جي نسير هانكه به حاجات حاليه افراح : ايش رأيش بهذا ريما : يع مشو حالي شوفي هذا والله ماقبله ولا بعده افراح : بعدش ريما : لو سمحت اشتي مثل ذيه اربعه عمر : ارع ارع لمن ذولا بكلهن افراح: لنا عنطقم جمعه عمر : ياسلام واحنا عنطقم لنا للمه ماانتين ريما : حالي بس انتظر نحاسب ونسير معك نساعدك في الاختيار عمر : لو سمحت يااخ اقطبنا ......:اتفضل 🛍 وساروا قسم الرجال افراح: عمر ابسر هذولا حاليات عمر : ايش رأيش ياريما ريما التفتت لاعند افراح: اول مرة تدي حاجة صح هههههه افراح : ضربوا قرنش اخطي من قبالي : عمر: اصه مزعبقات الناس بيتلفتوا صلينا ريما : قله يدي لكم بسرعه علاسب عنتأخر عمر: لو سمحت اشتي من ذيه خمسة .......:طيب جي بعدي ادي لك من داخلt: عمر : انتظرين هانا افراح: لاتتأخر عمر: لما اكمل شااتصل لكن

ــــــــــــــــــــــــــــــــــــــــــــ

جميع الحقوق محفوضة

لقناة روايات يمنية